Ekainaren 16ko bileraren ostekoa

1.- 2011-2012 ikasturterako Berritzeguneak eskaintzen duen mintegien erabakien azalpena, mintegiz mintegi azalpena eman da.

Ikasturte honetako zuzendarien mintegiko lan-planaren ahozko balorazioa egin da:
Balorazioa atal hauetan- helburuak, edukiak, denboralizazioa, aholkularien zereginak, mintegikideen ardurak eta norberarenak- baikorra izan da. Datorren ikasturtean “Ikastetxearen urteko plana eta urteko memoria egiteko gida” eta gelako programaizoak aztertuko dira.

Maiatzaren 19ko bileraren ostekoa

Bilera honetan bi gai aztertu ditugu eta hauek dira aipagarrienak diren atalak:
1.- Prestakuntza eta Berrikuntzako deialdiaren gainean argitasun batzuk:
• Ikastetxeko proiektu bakarra izan behar du.
• Proiektu honek jarduera desberdinak izan ditzake baina jarduera bakoitzak gutxienez 15 ordu izan beharko ditu.
• Irakasle batek, nahiz eta ordu gehiago egin, gehien jota, 30 orduko ziurtagiria jaso dezake deialdi honegatik. (90 ordu beste deialdi batzuetan parte hartu izana kontuan harturik).
• Proeiktuan agertzen diren jarduerak/ek hobekuntza planarekin lotu behar dira, baina horrela ez balitz proiektuaren garapenean ( II. erankinean) 2. atalean proiektuaren testuinguru eta azalpenaren barruan ondo adierazi behar da ikastetxeko Hezkuntza proiektuarekin edota Curriculum proiektuarekin edota Urteko planarekin lotura duela eta bere zentzua ondo justifikatuta dagoela.
• Ekintza bakarrean edo desberdinen arteko baturan parte hartzen duten irakasleen kopuru osoak %60koa izan behar du.
• Proiektua garatzeko orduan, kontuan hartu II. Eranskina eta VIII.a batera. Hau da, proiektuak izan behar dituen atalak gehi balorazio irizpideak. Beraz, proiektuak.net-en agertzen den aplikazioaren atalak, II.erankinean agertzen diren azalpenez (puntuez) osatu behar dira, ez ahaztu ordea, VIII. Eranskineko ebaluazio-irizpideak.

2.- IKT prestakuntza DBHko 1. eta 2. irakasleei zuzendua egongo da.
Prestakuntza hau bi eratan antola daiteke:
1. Berritzeguneko aholkularien bitartez Berritzegunean bertan antolatuko diren mintegien bidez.
2. Ikastetxean bertan egin daitekeen prestakuntza ikastetxeko IKT dinamizatzailen bitartez..

Apirilaren 14ko saioaren ostekoa

Aniztasunari buruzko programen deialdiak irakurri eta zehaztu genituen. Programa hauek Hezkuntza Berriztatzeko Zuzendaritzatik bultzatuta daude eta hauek dira:
A – 1. Kulturartekotasunaren sustapena: kulturarteko dinamizazioa eta hizkuntza-errefortzua.
A – 2. PROA plana: laguntza-plana.
A – 3. PROA plana: Indartze, Orientazio eta Laguntza Programa.
A – 4. Hezkuntza Berariaz Sendotzeko Programak (HBSP).
A – 5. Curriculum Anitzeko Programa.

Lehenengoz, argi utzi genuen jarraibideetako deialdian I. eta II. Eranskina kontuan izan behar ditugula edozein programetako eskaera betetzeko bai programan jarraitzeko zein berria eskatzekoa bada.
Ondoren, programa bakoitzean eskatzen diren berariazko eranskinak gehitu behar dira.
Azkenik, gogoratu maiatzaren 6a ( barne) dela eskabideak Bizkaiko Ordezkaritzan aurkezteko azken eguna. Ez ahaztu hiru kopia (bata originala eta besteak fotokopiak) eraman behar direla.

Ikastetxeetako lidergoa eta bilera-motak txostenak

Ikasturte honetan BIHEk martxoaren 16 eta 17an ikastetxeetako lidergoari buruzko jardunaldiak antolatu zituen. Bertan, gure eskualdeko ikastetxeetako zuzendari batzuk eta Berritzegunekoa ere egon ginen. Jardunaldi horretan Bernard Hogonnier ( Director General Adjunto de Educación de la OCDE)en hitzaldiaren edukia eskegiko da hemen. Bere azalpena atal hauetan oinarritu zen:
• OCDEak bere eginkizunen artean zergatik ikastetxeetako lidergoari buruzko analisia egiten duen.
• Zein den gai honen inguruko diagnosia.
• Zeintzuk diren OCDEak proposatzen dituen gomendioak.
• Aldaketarako programa bat.
Azterketa honek eztabaidarako eta analisirako aukera handia ematen du.

Horretaz aparte, gaurko bileran erabilitako bilera-motak  txostenak ere hementxe eskegiko dira.

Martxoaren 23ko bileraren ostekoa



Saio honetan bi deialdi aztertu ditugu, bata ikastetxe publikoetarako HEZKUNTZA MARKO HIRUELEDUNAREN deialdia eta bestea BERRIKUNTZA eta PRESTAKUNTZAKO proiektuetakoa.

HEZKUNTZA MARKO HIRUELEDUNAREN deialdia aztertzerakoan  atal hauek aipatu ditugu: non aurkitu deialdia digitalizatuta nahi den informazioaz ohartzeko, zenbat ikastetxek aukera izango duten deialdi honetan parte hartzeko, zein mailetan hasi eta zenbat ordu edo saio bete behar diren, zeintzuk diren irakasleek bete behar dituzten baldintzak, ikasleei begira zein ezaugarri bete behar duten proiektu honetan parte hartu ahal izateko, ikasle-taldearen arabera zenbat diru eta ordu kreditu izango duten, esperientzi honen jarraipena eta ebaluazioa nola gauzatuko den, eskaerak egiteko zeintzuk eranskin bete behar dituzten.

Gogora ezazue ESKABIDE-EPEA: 2011ko apirilaren 15era arte izango dela eta eskabideak “on-line” bete beharko direla

BERRIKUNTZA eta PRESTAKUNTZAko DEIALDIAren informazioa zirriborroan izan dugu. Zirriborroa hau aztertu dugu eta zalantzak argitu baina behin-betiko deialdiaren zain gaude.

OTSAILAREN 17ko SAIOAREN OSTEKOA: PROGRAMAZIO LABURRAK

El inspector, posted with vodpod

 

Gaurko saioan “Programazio laburr”-en gainean gora eta behera ibili gara. Irrifarrez hasteko aurreko bideo ikusi dugu. Zuen burua honetan ikusten duzue? Espero dugu zuen ikuskaria holakoa ez izatea!Hau dela eta, ikastetxeetako eredu desberdinak aurrean izanda, hainbat galdera, zalantza, oztopo… sortu dira. Baina Berritzegune Nagusiko lanari esker tresna lagungarria (Programazio laburrak idazteko iradokizunak) izan dugu batzarrean sortutako oztopoei irtenbidea bideratzeko. Dokumentua azaletik aurkeztu baino ez dugu egin. Datorren bilerarako txosten hau aztertzea denon lana izango da.Dokumentua gazteleraz ere erabil dezakezue.

2011ko urtarrilaren 20ko saioaren ostekoa

Batxilergoko ebaluazio-prozesua arautzen duen  AGINDUAren 32. artikulua aztertu da, hain zuzen ere,  ikasgaien ebaluazioaren inguruko erreklamazio-prozesua.  

 4. atalean adierazten den moduan, “ikastetxean bertan erreklamazioak egiteko prozedura ikastetxeko Antolamendu eta Funtzionamendu Erregelamenduak edo Barne Erregelamenduak xedatutakoaren araberakoa izango da. Ordea, ikastetxeak duen erregelamenduaren legaltasuna kolokan jarri da eta ikuskaritzaren laguntza ezinbestekoa dela azpimarratu da.

 Honekin lotuta ere, 32. artikuluan adierazten dena aurrera eramateko kontuan hartzekoa da “Ikasleen eskubide eta betebeharrak” dekretuan azaltzen dena.

 Hurrengo saioan, otsailak 17, programazio laburrak aztertuko ditugu.

Irakurketa interesgarria

Oporrak amaitu dira eta zein gogorra den aurreko hamabost egun lehenago esku artean izan ditugun hainbat gauzaz gogoratzea. Baina 2011kako hasiera, URTE BERRIA, aprobetxatu behar dugu gure iparra , zuzendariak garenez gero, zein den gogoratzeko. Gure zereginetan astiro- astiro murgiltzen joateko ez duzu uste jarraian txertatzen dizuegun artikulua irakurtzea egokia izan daitekeela? Hona hemen Liderazgo pedagogikoari buruzko artikulu bat. Ondo ibili eta laster arte.

Abenduaren 16ko saioaren ostekoa

Pasa den ostegunean, abenduaren 16an, izan genuen Bigarren Hezkuntzako Zuzendarien mintegi bileran jarraian agertzen diren  puntuak landu genituen:

1. 2010-2011 ikasturteko lanplana  onartu da, helburuak, denboralizazioa, aholkularien zereginak eta mintegikideen ardurar zehaztuz.

2. Batxilergoaren antolamendua eta ebaluazio-prozesua arauntzen duen 2010eko uztailaren 26ko AGINDUAren hausnarketa egin da, batez ere atal hauek aztertuz: 5.2, 6.4a, 6.4b eta 23. artikuluetan.

3. Berritzeguneak datorren ikasturtean antolatuko dituen jardunaldien inguruko iradokizunak bildu dira.

4. Hurrengo saioetarako interesgarriak izan litezkeen gaien inguruan elkartrukea egon da.

Hurrengo saioa urtarrilaren 20an izango da eta bertan landuko diren gaiak honako hauek:

• 2010eko uztailaren 26ko Aginduaren 32. artikulua: ikasgaien ebaluazioaren inguruko erreklamazio-prozesua.
• Programazioak aztertu.

Azaroaren 18ko bileraren ostekoa

Aurreko saioan 2010-11 ikasturterako lan-plana osatzeko lau galdera erantzun barik gelditu ziren. Saio honetan horri amaiera eman diogu eta ondoren, Batxilergoaren antolamendua eta ebaluazio-prozesua arautzen duen AGINDUA, 2010eko uztailaren 26koa, aztertzen hasi gara.

Berritzegunetik bideratu egin da lehenengo hausnarketa hiru eremutan. Lehenengoa Agindua zein marko legalean oinarritua den jakiteko, bigarrena Aginduaren sarreran agertzen den ikusmiraz, filosofiaz edota tendentziaz ohartzeko eta hirugarrenez, ikastetxe bateko batzorde pedagogiko batek Aginduan azpimarratzen diren artikuluen artean zeinetan sakondu beharko lukeen gehiago adierazteko.

Saioa bukatu egin da baina honetan sakonduko dugu gure hurrengoko saioan, hain zuzen ere abenduaren 16an.